Jazarpena jasaten ari direla salatu dute Goierriko AHTren aurkako taldeek

berria Abiadura handiko trenaren (AHT) aurkako ekintzetan parte hartzeagatik eskualdeko hainbat lagun «jazarpen poliziala» jasaten ari direla salatu du Goierriko AHT Gelditu! Elkarlanak. «Kalean kartelak jartzea bakarrik nahikoa izan daiteke jazarpena jasateko, eta zer esanik ez bilkura batean parte hartzea», adierazi zuten atzo Goierriko AHT Gelditu! Elkarlaneko kideek. Haien esanetan, «lotsagarria eta onartezina» da gertatzen ari dena. «Inpunitate osoa dute, gainera, nahi dutena egiteko».

Salatu dutenez, Eusko Jaurlaritzatik eta Ordiziako Udaletik ez zaie proiektuari buruzko behar bezalako informazioa eman. «Proiektuari buruz eztabaidatzeko aukerarik ez digute utzi, eta oraindik ere larriagoa dena, AHTren aurkako herri mugimendua kriminalizatzen ari dira». Haien arabera, AHT «Ibarretxeren eta EAJren» proiektua da, eta obrak gelditzeko eskatu dute. Horrekin batera, urriaren 21erako elkarretaratzea deitu dute, 13:00etan, Tolosako (Gipuzkoa) epaitegiaren aurrean. Egun horretan, epailearen aurrean deklaratu beharko dute hainbat gaztek, otsailean AHTren aurka Beasainen (Gipuzkoa) egindako mendi martxaren karietara.

Europako Batzordearen kezka

Bestalde, AHTren inguruan Espainiako eta Frantziako gobernuek «koordinaziorik ez» dutela salatu du Europako Batzordeak. «Proiektuak Gasteiz-Hendaia-Akize zatian dituen zalantza teknikoak uxatzeko, ezinbestekoa da bi herrialdeek plangintza zehatza egitea», iritzi dio Etienne Davignonek, Europako hego-mendebaldeko trenbide sarearen koordinatzaileak.

Davignonek aurkeztutako txostenaren arabera, «desoreka nabarmenak» daude Espainiak eta Frantziak AHTren inguruan duten plangintzen artean. «Bi herrialdeak ados jartzen ez badira, eta desoreka horiekin jarraituz gero, arriskuan egon daiteke Pirinioetako mugikortasun politika». Hala, bi herrialdeei dei egin die proiektuaren inguruan adostasuna lortzera.

This entry was posted on Thursday, October 16th, 2008 at 12:26 am and is filed under Albiste orokorrak, Iritzia. You can follow any responses to this entry through the RSS 2.0 feed. You can leave a response, or trackback from your own site.